20070201 bradum kemur betri tid
-
Upload
mar-wolfgang-mixa -
Category
Documents
-
view
137 -
download
3
description
Transcript of 20070201 bradum kemur betri tid
________________________________________________________________________
Bráðum kemur betri tíð
Undanfarin ár hafa verið hagstæð lántakendum hvað varðar vaxtakjör á verðtryggðum
lánum. Um árabil hefur aðgengi fólks að fjármagni vart verið betra og vaxtastig lána jafn
lágt. Samhliða auknu aðgengi að lánum og betri kjörum jókst eftirspurn eftir fasteignum
sem leiddi til mikilla verðhækkana og þ.a.l. stuðlaði að hærri verðbólgu. Hækkun á virði
fasteigna er ein af höfuðástæðum hárrar verðbólgu undanfarin ár og mældist hún um 7%
síðastliðið ár. Þetta þýðir að lántakendur verðtryggða lána greiddu almennt um 11-12%
vexti á árinu. Í kjölfar hárrar verðbólgu hafa lántakendur aðeins að hluta til notið góðs af
lágu vaxtastigi; staðreynd sem hefur verið vettvangur tíðra skrifa um afnám
verðtrygginga á lánum.
Nú bregður hins vegar við að flestar verðbólguspár fyrir árin 2007 og 2008 gera ráð fyrir
aðeins um 2-4% verðbólgu. Jafnvel eru vangaveltur um neikvæða verðbólgu sumpart
þessa árs, aðallega í kjölfar boðaðra lækkunar skatta og tolla á matvælum. Lántakendur
verðtryggða lána, sem verðbólgan hefur leikið grátt, geta því huggað sig við að
framundan sé betri tíð. Þeir sem skulda óverðtryggt, til dæmis með yfirdrætti, koma hins
vegar til með að borga afar háa raunvexti á tímabilinu, sem kemur þó væntanlega eitthvað
til með að lækka samhliða spám um lækkandi stýrivexti sumarið 2007. Næstu mánuði er
þó hætt við að raunvextir á slíkum lánum nemi á bilinu 15-20%, sem er jafnvel enn hærri
vaxtaprósenta en sú sem lántakendur verðtryggðra lána hafa mátt þola undanfarin misseri.
Enn er stór hópur fólks sem, af gömlum vana, hefur stóran hluta lána sinna í formi
yfirdráttar, sem er óverðtryggt lán. Auk þess eru margir einstaklingar ekki búnir að nýta
sér hið aukna aðgengi að lánum sem er fyrir hendi. Hækkun fasteignamats hefur ekki
aðeins minnkað vaxtabætur hjá mörgum heimiliseigendum eins og mikið hefur verið
fjallað um heldur hefur það einnig aukið svigrúm fólks til að taka verðtryggð lán hjá
bönkum og lífeyrissjóðum, þar sem oftast er miðað við hlutfall af fasteignamati þegar
hámark lána er metið. Nú hafa skapast aðstæður sem gera það vænlegt fyrir þann hóp að
umbreyta lánum sínum úr óverðtryggðum yfir í verðtryggð lán.
________________________________________________________________________
Vextir á lífeyrissjóðslánum hafa hækkað aðeins undanfarið en eru þó almennt í kringum
5%. Þetta þýðir að samtals árlegur vaxtakostnaður næstu tvö árin, miðað við almennar
verðbólguspár, verður um það bil 7-9%. Næstu mánuði verður sá kostnaður hugsanlega
töluvert minni. Samanborið við óverðtryggða vexti munar miklu á vaxtakostnaði, jafnvel
allt að 10% árið 2007.
Væntur vaxtamunur næstu 12-24 mánuði er reyndar það mikill að hægt er að taka lán
með verðtryggðum vöxtum, kaupa óverðtryggð stutt skuldabréf, peningasjóði sem í boði
eru hjá fjármálastofnunum eða víxla, og eiga möguleika á töluverðum jákvæðum
vaxtamun. Ávöxtun slíkra fjárfestinga hefur undanfarið verið á bilinu 13-15% (almennt
er gert ráð fyrir að þessi ávöxtunarkrafa lækki töluvert síðari hluta þessa árs). Miðað við
þær tölur er nettó ávöxtun eftir greiðslu fjármagnstekjuskatts slíkra fjárfestinga í kringum
12-13%. Næstu mánuði verður því að öllum líkindum töluverður vaxtamunur, sem er
lántakendum verðtryggðra lána í hag.
Söngur Stuðmanna um að bráðum komi ekki betri tíð höfðar því líklega lítt til lántakenda
verðtryggðra lána næstu mánuði og jafnvel ár; og vissulega getur tíðin orðið betri.
Samkvæmt ofangreindu er hagstæðara að skulda verðtryggt en víxlar og óverðtryggð
skuldabréf eru góðir fjárfestingarkostir í núverandi vaxtaumhverfi, enda flæðir erlent fé
til Íslands í slíkar fjárfestingar.
Már Wolfgang Mixa
1. febrúar, 2007
Viðbót 11/2010
Flest allt sem fram kemur í þessari grein kom á daginn. Betra var að skulda verðtryggt frekar en óverðtryggt næstu mánuði eftir að greinin birtist og þrátt fyrir mikla verðbólgu árið eftir var enn dýrara að vera með yfirdráttarlán. Niðurstaðan að betra væri að skulda verðtryggt og eiga óverðtryggt átti því rétt á sér í ákveðinn tíma. Ólíkt næstu grein sem ég skrifaði, þar sem ég varaði við erlendum lántökum, eru ekki fjallað hér um hættuna af því að skulda. Ég meira að segja bendi á að hægt sé að kaupa víxla sem veittu í raunveruleikanum betri ávöxtun næstu mánuði, enda var þá ekki farið að misnota peningamarkaðssjóði í þeim mæli sem gerðist örstuttu síðar. Skilaboðin eru engu að síður slæm. Því tel ég að þó svo að ég hafi skrifað spár í greinum sem hafa síður gengið eftir að þetta sé versta grein á ferli mínum. mwm