Page 1 of 2

Mbɑ' yòh yì á ntáb pʉh lɑ, dhì zǒ mʉ.

Ǒ sì sɑ' séè njēē nùsìpə' mōh, Ǒ sì sɑ' séè njēē nshʉɑnù mōh.

Ǒ sì sɑ' séè njēē mvàk yì ngáp nkō' ngāp lɑ, Ǒ sì sɑ' séè njēē mvàk yì khʉɑ' nkō' khʉɑ' lɑ,

Mbhì fà'á Ò dhī zǒ sáá, ntəə tɑ ngɑ nsōk ō!

Ǒ sì sɑ' séè njēē mvàk yì mǒ' wěn ndī' shwīē ní ɑ nǎh ghěn kò,

Mǒ' wèn mɑ nshwīē ɑ nǎh tʉʉ mēmmɑ à lɑ. Ò sì sɑ' séè njēē mvàk yì mǒ' wěn ndī' nū hǔ nǎh cāk mōō,

Mò' mɑ nnū ɑ nǎh tēhmōō lɑ.

Táàwɑ Nshʉɑpʉ Sīē, mbhì fà'á Ò dīē lōh ò, Ntəə tɑ ngɑ nhɑ mbú ò!

Ò sì sɑ' séé njēē mvàk yì mǒ' wěn ngʉ nkɑɑ bì náh nshīī ngòòndəb ì,

wènòk mɑ mbhǐ ì nkūɑ nzhìèkū' lɑ! Ò sì sɑ' séé njēē mvàk yì mǒ' wěn ndī' bɑ Nèè mbōk mʉnzhwīē,

Mò' mɑ Pūāntòò ngʉ kəə mɑghɑɑ lɑ.

Ndì à Nshʉɑpʉ, n hɑ ō ntəə mɑ lāhā tɑ ó yū'?

Ǒ sì sɑ' séé njēē mvàk yì pɑlɑ' ndī' mɑ fɑ' ɑ lǎh shīī ngə', Pɑnsɑ'ngə' mɑ ndáh nkɑɑ náh ngén ndó' ngə'sìtə'kə lɑ!

Ò sì sɑ' séé njēē mvàk yì wěn mbʉɑɑ mɑ fhʉ wèn yɑɑ sīē Tɑ pō tēh shú' nkɑɑ náh nzhíísí fhʉ í lɑ.

Ò sì sɑ' séè njēē mvàk yì mǒ' pʉ nzɑ mɑ lʉ' zìmó' pʉ lɑ. Ò sì sɑ' séè njēē mvàk yì mɑvʉ mfí pō zāb mvʉɑ lɑ.

Nzɑmbʉ', mɑnʉ' Nshʉɑpʉsīē, tɑ ǒ kònjū' ntəə zǎ lɑ!

Ntəə tɑ nshʉɑ fě'è sī wū bɑ.

Ǒ sì sɑ' séè njēē mvàk yì mǒ' wěn ngʉ hù nàh njáhsí ghòò ndʉʉ lɑ. Ǒ sì sɑ' séè njēē mvàk yì mǒ' wěn mfɑ' ngù' ghāp njɑɑ sīē

Mǒ' sìzɑngwā' lāh tɑ' līē' nhū lɑ. Ǒ sì sɑ' séè njēē mvàk yì mǒ' wěn ncāk nzhwīē ì njɑɑsīē à zhīē nzhwīē ngə' lɑ.

Ǒ sì sɑ' séè njēē mvàk yì wěn ngúh nzhwīē ì mbōk nkɑɑ nàh ndəə lɑ. Mbɑ' yòh yì á ntáb pʉh lɑ...

Tìē Cǎmnà', Kòrēà Njàmndàk. līē' 5, Mɑngà'nshì, 2014.

Page 2 of 2