1

茶鄉太平冬遊記

Chinju Iunn 楊 振 裕

教育部漢字 kap 台羅合用

幾若工前，台中市大墩台語教育學會就有好朋友相招，約定今仔日 1

月 30 日（禮拜二）beh 去嘉義梅山�迌，欣賞太平雲梯美麗ê景緻。梅山是

出名ê茶鄉，太平雲梯 koh 是舊年９月拄開幕、新興ê熱門景點，tsiânn 久就

想欲去行行看看咧--ah，所以自從答應了後，心內就一直充滿期待。

無疑悟中央氣象局報導講，對１月２９開始，因為受著強烈大陸冷氣

團ê影響，台灣各地ê氣溫將會明顯下降，透早低溫 kan-na 有 12~13 度

niā-niā，而且會愈來愈冷，2 月初 1 起寒流南下，低溫甚至可能下探到 10

度以下……。這款ê天氣是 beh 按怎�迌？Koh 是 beh 去到海拔 1000 公尺

左右ê梅山鄉太平風景區--neh？

擔心歸擔心，心內ê期待並無減少。30 日早起，彰化市氣溫 12 度，koh

落霎霎仔雨，我 tsham 牽手透早７點準時出門，駛車行中山高接 78 號快速

道路往東，tī 古坑交流道落去，紲落去行 3 號省道，一路真順序，不而過天

色無開，雨毛仔 mā 無停。阮想講，這逝路白行--ê--ah，雨澹水滴 kám 有法

度 thang 耍？

牽手講：「天公伯--仔保庇，無定著較停仔就變好天--ooh！」我 mā 是

仝款按呢想。講起來 mā奇怪，車一駛上一般叫做「梅太公路」ê 162 甲縣

道了後，雨真正停--ah，氣溫雖然才 11 度 niâ，m̄-koh 視線做一下攏清--起

來，阮沿路那看景色那開講，心情也綴咧好--起來。車對平地勻勻仔 peh 懸，

行 3 公里了後，來到出名ê「梅山 36 彎」，也就是 36 个頭毛鋏仔彎（「髮夾

彎」），山路彎過來、斡過去，一直彎到太平雲梯進前，過了「162 甲縣道」

12k 為止，mā 已經 peh 懸來到海拔 1000 公尺--ah！這个中海拔ê「梅山 36

彎」，tsham 霧社迵武嶺ê高海拔公路相仝，攏是跤踏車選手上佮意--ê，訓練

體能佮膽識ê好所在。昨日（tso̍h--li̍t）1 月 28 禮拜日拄辦煞ê「2018 嘉義梅

2

山太平雲梯 ma-lá-sóng」，吸引著台灣各地真濟 ma-lá-sóng 好手前來參加，

其中全程組(42k)、超半程組(28k)佮挑戰組(12k)ê路線，就攏是以 ē-tàng 走

著出名ê 「梅山 36 彎」，做為行銷ê重點！

「梅山 36 彎」真趣味，每到一个彎，就有 tshāi（「豎立」）一塊顯目ê

牌仔，標明當地ê海拔有偌濟？親像第 1 彎海拔是 362 公尺、第 2 彎海拔是

368 公尺、第３彎海拔是 393 公尺、第 31 彎海拔是 900 公尺……，車沓沓

仔駛，經過幾若个彎 koh 幾若个斡，牽手--ê目睭那看喙那唸，過了第 36

彎，太平到--ah，太平雲梯就 tī 面頭前！

Koh 向前行，經過太平大飯店，阮斡倒手爿來到太平國小（太平生態

人文實驗小學）。學校ê環境真媠，歷史 mā 真悠久，孫婿（「姪女婿」）ê兩

个阿舅沈耀相、沈耀宜兄弟仔前後 24 年（1974～1998）bat tī 這間學校做過

校長，並且創立梅山文教基金會，對梅山地區ê文化教育，付出真濟心血。

定定聽著孫婿講起 in 兩人為梅山文教拍拚ê點點滴滴，hōo 阮印象 tsiânn 深

刻，這擺特別入去校園踅踅咧，對 in 兩个教育前輩表示深深ê敬意。

集合ê所在 tī 隔壁半山腰ê三元宮，阮 kā 車駛去歇 tī 闊闊ê停車場，才

８點半 niā-niā，離約定ê時間猶有半點鐘，就 tī 廟埕附近行行看看咧。三元

宮是全台灣海拔上懸ê天公廟，是 1978 年才改建完成--ê，廟宇外觀莊嚴宏

偉、香火鼎盛，m̄-nā 是太平村ê信仰中心，mā 已經成做太平風景區重要ê

觀光景點之一。

9 點外，7 台車計共（總共）20 外个人攏到齊--ah，當地太平社區發展

協會理事，mā 是今仔日ê導遊嚴清墩大哥 tiō�著逐家，順著產業道路去到

海拔 1279 公尺ê二尖山，欣賞出名ê龍眼林茶園秀麗ê風光。逐家徛 tī 懸懸ê

山頂，看向規山坪青 lìng-lìng ê茶園，宛如世外桃源一般，實在媠 kah 袂曉

講--lah！彼陣氣溫雖然才 10 度左右 niâ，逐家卻是熱情大放送，歡喜 kah

也講、也跳、也笑，kham-mé-lah、手機仔捎咧翕無停！

Tī 山頂徛無外久，陣陣雺霧吹--過來，規山坪ê茶園攏消失去--ah，變

成一大片白茫茫 ê世界，人徛 tī 飄來飄去ê山雺中，koh 袂輸是騰雲駕霧ê

神仙咧！

3

嚴大哥�逐家沿著茶園邊仔ê山路，沓沓仔向山跤行--落去。阮７个司

機駛落來半中站ê龍興宮，倒頭行 peh 山去 kā in 迎接。阮對龍興宮邊仔ê小

路上山，經過宮後ê亭仔，連鞭來到一片開闊ê茶園，茶園邊有一段用柴枋

仔搭建ê步道，順著崎崎ê山勢沓沓仔衝（tshìng）懸，大概有 2～300 坎ê款！

躼躼長ê柴枋仔步道有漆紅色佮黃色，袂輸一尾仔活龍一直衝上天！「飛龍

在天」是古早帝制時代對帝王在位美化ê講法，這馬無時行--looh，這段柴

坎仔步道號做「莫（mài）走步道」，就是叫人愛細膩，怙（kōo）行--ê，m̄通

怙走--ê--lah！

行完「莫走步道」，進入一片青翠ê竹仔林。涼涼ê天氣，無落雨，日頭

mā 出來--ah，實在是�迌ê好時機，有夠讚--lah！竹林內石坎仔一坎一坎袂

歹行，無偌久就拄著落山ê好朋友，逐家歡喜做伙翕相，才 koh 慢慢仔做陣

行過茶園，落來宮後ê亭仔，tī 遐歇睏、食糖仔餅，講天講地、講笑詼，講

一寡台語教學ê心適代，攏無感覺時間真緊咧過去。

紲落去，阮 koh 去附近ê碧湖山休閒茶園遊覽。碧湖山茶園 tī 阿里山國

家風景區ê西爿，海拔 1200 公尺，四面攏是山，正對面就是中央山脈，一

个山頭連接一个山頭，峰峰連綿到天邊，高峰峻嶺，氣勢非常壯觀！

彼陣日頭展出笑容，氣溫漸漸回升，山雺 mā 攏退去--ah，茶園ê步道有

幾若欉櫻花當咧大開，有夠迷人--ê！逐家 peh 起哩茶園上頂懸ê觀景台，視

野全然無遮無閘，對照阿里山國家風景區管理處所設立ê解說牌，斟酌 kā

看詳細，遠遠ê所在，關仔嶺、大凍山、阿里山、玉山、大塔山、小塔山、

豐山，以及 koh-khah 北爿ê杉林溪、合歡山，全部攏看 kah 清清楚楚！

Uâ～à！這个 view（景觀圖），無地揣--lah，正港是世界級ê美景！

Koh 向頭前ê山谷看--落去，山嶺青青青，一坵一坵排 kah 真有藝術感、

一望無際ê茶園，koh 有茶農ê房屋佮庄頭出入ê道路，攏完全收入目睭底。

彼是一幅大自然精心設計ê圖畫--ah！Beh 去佗位才 ē-tàng koh 揣著這

款ê人間仙境？

看 koh 再看，忍不住再三流連、讚嘆！一直 tī 心內替家己感覺真幸運，

有機緣 tsham 一群好朋友做伙看著遮爾媠ê景緻，kám m̄是非常大ê福氣？

4

中晝--ah，阮落來山跤太平雲梯停車場對面ê餐廳食飯，食飽了後，就

行過去遊賞太平雲梯，太平國小ê師生 tī 雲梯ê入口進行「新春團圓佮多元

展能」ê學習活動，鼓勵遊客提「過關卡」，只要攑毛筆佮學生仔合作寫一

字「春」字，就算過關--ah，ē-sái 得著春聯佮茶葉卵ê獎品。現場氣氛真鬧

熱，可惜阮時間有限，無法度參加過關ê活動，只好大聲拍噗仔 kā in 鼓勵！

楊國明老師是梅山出身ê詩人，對家己ê故鄉有真深ê感情。伊特別寫兩

首描寫梅山自然風貌佮人文生態ê詩，由彭富鈺老師用毛筆寫 tī 宣紙頂頭，

tī 太平雲梯ê入口處朗誦。阮逐家 tī 入口ê坎仔頭前排做一排，kā 長條ê詩作

展（thián）--開，請國明老師唸伊ê詩，詩寫了真好，國明老師 koh 唸 kah

真有感情，逐家攏真受感動，kā 伊拍噗仔 koh 比大捗拇！彼陣太平村ê村長

拄好 mā 在場，伊是地方ê耆老（kî-nóo），看了 mā 歡喜 kah 笑 bún-bún！

太平雲梯全長 281 公尺，是全台灣上長、海拔上懸之景觀吊橋。Peh 起

哩造型美觀ê雲梯頂仔，天氣好ê時陣，聽講梅山 36 彎ê美景攏 ē-tàng 看 kah

一清二楚，上遠甚至 ē-tàng 看著嘉南平原！不而過阮下晡一點左右到位ê時

陣，吊橋底仔ê溪谷不時有一陣一陣ê雺霧，連鞭飄過來、連鞭飄過去，國

明老師講橋跤有經過美麗ê三原彩虹水沖（「瀑布」），因為雲霧 khā 牢咧ê關

係，阮啥物 mā 無 khuàinn（看見）！

行過吊橋，tī 橋頭ê觀景台賞景、翕相，了後繼續行「雲之南道」ê步

道。雲之南道步道全長 785 公尺，一開始是一節直直 peh 懸，大約 2~300

坎ê石坎仔，peh 到懸頂一看，雲霧攏散去--ah，視野真曠闊，koh 向前行一

站仔，看著「龜山前峰」ê觀景台，對懸懸ê台仔頂看向四箍圍，m̄-nā 景色

真媠，koh 聽好（thìng-hó）看足遠--ê，實在是一大享受！

步道經過規大片ê茶園，有真濟少年爸母�囡仔出來�迌，tī 茶園邊仔

排姿勢翕相，不時傳來陣陣ê笑聲。導遊嚴大哥沿路行，沿路 kā 逐家紹介

路邊ê植物佮梅山當地趣味ê故事，阮那行、那聽、那開講，感覺心情真輕

鬆。簡秋榮兄是出名ê老歌歌王，伊咧唱歌聲頭飽、中氣十足，而且咬音清

楚 koh 充滿感情，伊沿路唱幾若塊老歌 hōo 阮聽，有聽著ê人，真正攏是耳

福不淺！

5

經過第三座涼亭仔以後，阮慢慢仔行轉來山跤ê停車場。紲落去，逐家

koh 去附近ê景點（仙人堀、巧雲小棧）lau-lau 踅踅咧，體驗茶鄉無仝款ê

迷人風貌。下晡４點左右，阮踅轉來行短短幾百公尺長ê太平老街，遐是阿

里山高山茶ê故鄉，mā 有人 kā 叫做「茶之道」。嚴大哥就蹛 tī 老街，聽伊

講太平村ê舊名叫做「大坪 tuā-pênn」，因為有人講「大坪 tuā-pênn」kah「大

病 tuā-pēnn」ê發音強 beh 相倚，驚 hōo 人誤會，後來才改名--ê。早期大坪

是嘉義梅山ê高山聚落，mā 是出外人做生理必經ê通道，不止仔鬧熱--neh！

阮 tī 老街看著百年古厝佮一寡歷史性ê建築，猶保留往過原始ê外觀，

嘛有袂少已經翻新過抑是增建過，時代ê跤步永遠無停睏，新舊交替之間到

底有啥物值得咱好好仔保存佮珍惜，需要逐个慎重來思考。

Tī 老街 ē-tàng 看著真濟人徛家頭前攏有吊各種雞型ê掛飾，彼个閹雞ê

圖形意象，原來是為著 beh 紀念日治時代當地出名ê文學家－－張文環先

生。張文環先生出世 tī 大坪，是土生土長ê梅山人，伊ê文學作品描寫囡仔

時代山居生活ê記憶，以及山村樸實小人物ê生活圖像，攏不止仔深刻、使

人感動。伊不斷透過小說（親像：山茶花）來尋求自我定位佮表現社會關

懷，作品 m̄-nā見證歷史，藝術技巧 mā非常優美，是嘉義佮梅山ê寶貝，

koh-khah 是台灣文學史 buē-tàng 欠缺ê重要角色！阮 tī 老街ê文學牆外面踅

踅咧，數念以早這位傑出ê作家，順紲感染淡薄仔梅山厚厚ê文學氣。

下晡４點半 khah 加，笑聲滿山林ê旅程接近尾聲--ah。真感謝天公伯--

仔鬥幫忙，hōo 阮有遮爾好ê天氣 thang�迌。嘛感謝大墩台語教育學會賴雅

麗理事長佮炤慧、淑柑、妍媚、河坤、碧峰、耀書、……等等幾若个好朋

友ê邀請，hōo 阮 ē-tàng 搝 Lah-jih 兄（蕭平治老師）ê衫仔裾尾，綴大墩好

朋友ê後壁，去太平茶鄉歡歡喜喜耍一工！

（2018.1.30 初稿，2.1 修訂）

（本文發表佇 2018 年 4 月《台文戰線》季刊第 50 期）