ÅRS- MELDING 2013 - riksteatret.no · Komponist Ketil Bjørnstad. Lysdesignar Marianne T. Wedset....

ÅRS-MELDING

Som det einaste omreisande kulturtilbod til samtlege fylke i landet, har Riksteatret ein unik posisjon i det norske kulturlandskapet. Denne posisjonen medfører også eit stort ansvar. I lova for Riksteatret frå 1948 heiter det at «Riksteatret har til føremål å fremja arbeidet med å føra dramatisk kunst ut til folket i by og bygd og på andre tenlege måtar å auka kjennskapen til god dramatisk kunst.»

2013 var året då Riksteatret feira at vi har formidla dans til heile landet i 20 år. Vi tok også aktivt del i feiringa av to store hundreårsjubileum; Stemmerettsjubileet og Det Norske Teatrets hundreårsjubileum.

Riksteatret bruker store ressursar på formidling av dans, og vi leverer 50 danseframsyningar til 25 faste spelestader kvart år. Frå Dansens år i 1993 og fram til i dag har vi presentert over 50 koreografiar med over 200 dansarar involvert. Då vi i 2013 skulle feire «20 år på vegen med dans», valde vi to heilt ulike framsyningar. For det vaksne publikumet sendte vi ut Oslo Danse Ensemble med den svingande framsyninga MOVE. Iransk/norske Navid Rezwanis sjølvbiografiske hiphopframsyning Each One Teach One trakk eit mangfaldig publikum i alle aldersgrupper og vekte mange kjensler. Eg har fått eit utal epostar og brev frå eit takksamt publikum over heile landet.

Stemmerettsjubileet markerte vi med uroppføring av ungdomsframsyninga Søstra mi, skrive av feministen og sosiologen Hannah Helseth. Med eit ekspressivt og moderne sceneuttrykk skapte denne framsyninga stort engasjement og blei følgt opp med debatt i klasseromma landet rundt i regi av regionale likestillingssenter – om valmoglegheitene jenter og gutar har i samband med nære relasjonar og sex.

Det Norske Teatret fylte 100 år – og vi var med å feire: Riksteatret sende høgdepunkta fra teaterets repertoar på turné. Samarbeidet materialiserte seg i samproduksjonane Blackbird og Mens vi ventar på Godot, og nyproduksjon av Bikubesong for turné. Det var også ei glede å få tilby publikum på 47 stader over heile landet besøk av Svein Tindbergs Abrahams barn. Slik fekk vi oppfylt vår visjon om å skape store opplevingar og fulle hus, og markert Språkåret med rekordmange framsyningar på nynorsk.

Barneteater er eit viktig satsingsområde for Riksteatret, og vi er ubeskjedent stolte over at vi var først ute med å presentere ein sceneversjon av Jo Nesbøs populære barnebok Doktor Proktors prompepulver. Det blei ei leiken og musikalsk framsyning, som trakk eit stort og entusiastisk publikum. Ekstra stas var det at Nationaltheatret kjøpte konseptet frå oss for å lage ein egen versjon.

I tillegg til å vere leverandør av scenekunst til hele folket, ønsker vi å vere ei viktig stemme i den store offentlege samtalen i Noreg. Vi arbeider kontinuerleg med å gjere publikumstilbodet relevant, og levere tilleggsaktivitetar som foredrag og debattar, under overskrifta «Opplev meir». Det er vel det ein kallar å ta samfunnsansvar?

Når vi reiser rundt i landet, held vi ofte nettverksmøter for å bygge relasjonar og ha god dialog med dei vi er til for. Vi gjer vi alt vi kan for å treffe dei rette beslutningstakarane på kvar stad, for å lytte til behova deira, og for å vinne forståing for kor omfattande verksemda til Riksteatret er. Med den store auken i talet på nye kulturhus vi ser no, er det svært viktig for oss å forklare premissa for eventuelt å utvide talet på spelestader for Riksteatret.

I 2013 heldt vi 9 dialogmøter, og møtte omlag 270 representantar for spelestadene. Gang på gang får vi stadfesta frå politikarar og publikum kor avgjerende dei meiner det er for dei å få behalde Riksteatret som del av det faste kulturtilbodet lokalt.

Vi anstreng oss for å komme til så mange stader som vi maktar. Vi insisterer derfor stadig på kor viktig det er for oss at kommuneNoreg satsar på å gi kulturen gode rammevilkår.Det er både tilfredsstillande og gledeleg å vere ønska!

I den teknologiske, digitale revolusjonen vi er midt inne i, er eg sjølv ikkje i tvil om at levande møter der ein deler opplevingar med medmenneske ansikt til ansikt, til same tid i same rom, berre blir viktigare og viktigare. Eg er overtydd om at Riksteatret har ei viktig rolle å spele også i framtidas Noreg.

Ellen Horn, teatersjef